---
title: "Linked Discourses I: With Verses · Saṁyutta Nikāya · Sagāthāvagga"
author: "The Buddha"
translator: "Bhikkhu Sujato"
languages: [pi, en]
shelf: "Pali Canon"
section: 25 of 31
url: https://scriptura.si/works/pali-samyutta-nikaya-1/25/
cite: "The Buddha, tr. Bhikkhu Sujato, Linked Discourses I: With Verses · Saṁyutta Nikāya · Sagāthāvagga, section 25. Scriptura (scriptura.si), https://scriptura.si/works/pali-samyutta-nikaya-1/25/"
---

# Linked Discourses I: With Verses · Saṁyutta Nikāya · Sagāthāvagga

*The Buddha, tr. Bhikkhu Sujato*

The first book of the Linked Discourses: dialogues in verse with gods, Māra, nuns, brahmins and kings.

> Pali: the Mahāsaṅgīti Tipiṭaka (Buddha Jayanti edition, 2500), from SuttaCentral’s bilara-data, dedicated to the public domain (CC0).

> English: Bhikkhu Sujato, from SuttaCentral’s bilara-data, dedicated to the public domain (CC0). Notes are not included.

> Rows follow the segment numbers the two texts share, gathered into paragraphs; verse keeps its lines.

## 25. Lay Followers · SN 7.11–7.22

Source: https://scriptura.si/works/pali-samyutta-nikaya-1/25/ · cite a paragraph as https://scriptura.si/works/pali-samyutta-nikaya-1/25/#p-N

[¶0] SN 7.11 · With Bhāradvāja the Farmer

> Pali: SN 7.11 · Kasibhāradvājasutta

[¶1] So I have heard. At one time the Buddha was staying in the land of the Magadhans in the Southern Hills near the brahmin village of Ekanāḷa.

> Pali: Evaṁ me sutaṁ— ekaṁ samayaṁ bhagavā magadhesu viharati dakkhiṇāgirismiṁ ekanāḷāyaṁ brāhmaṇagāme.

[¶2] Now at that time the brahmin Bhāradvāja the Farmer had harnessed around five hundred plows, it being the season for sowing. Then the Buddha robed up in the morning and, taking his bowl and robe, went to where Bhāradvāja the Farmer was working.

> Pali: Tena kho pana samayena kasibhāradvājassa brāhmaṇassa pañcamattāni naṅgalasatāni payuttāni honti vappakāle. Atha kho bhagavā pubbaṇhasamayaṁ nivāsetvā pattacīvaramādāya yena kasibhāradvājassa brāhmaṇassa kammanto tenupasaṅkami.

[¶3] Now at that time Bhāradvāja the Farmer was distributing food. Then the Buddha went to where the distribution was taking place and stood to one side.

> Pali: Tena kho pana samayena kasibhāradvājassa brāhmaṇassa parivesanā vattati. Atha kho bhagavā yena parivesanā tenupasaṅkami; upasaṅkamitvā ekamantaṁ aṭṭhāsi.

[¶4] Bhāradvāja the Farmer saw him standing for alms and said to him, “I plough and sow, ascetic, and then I eat. You too should plough and sow, then you may eat.”

> Pali: Addasā kho kasibhāradvājo brāhmaṇo bhagavantaṁ piṇḍāya ṭhitaṁ. Disvā bhagavantaṁ etadavoca: “ahaṁ kho, samaṇa, kasāmi ca vapāmi ca, kasitvā ca vapitvā ca bhuñjāmi. Tvampi, samaṇa, kasassu ca vapassu ca, kasitvā ca vapitvā ca bhuñjassū”ti.

[¶5] “I too plough and sow, brahmin, and then I eat.”

> Pali: “Ahampi kho, brāhmaṇa, kasāmi ca vapāmi ca, kasitvā ca vapitvā ca bhuñjāmī”ti.

[¶6] “I don’t see the worthy Gotama with a yoke or plow or plowshare or goad or oxen, yet he says: ‘I too plough and sow, brahmin, and then I eat.’”

> Pali: “Na kho mayaṁ passāma bhoto gotamassa yugaṁ vā naṅgalaṁ vā phālaṁ vā pācanaṁ vā balībadde vā, atha ca pana bhavaṁ gotamo evamāha: ‘ahampi kho, brāhmaṇa, kasāmi ca vapāmi ca, kasitvā ca vapitvā ca bhuñjāmī’”ti.

[¶7] Then Bhāradvāja the Farmer addressed the Buddha in verse:

> Pali: Atha kho kasibhāradvājo brāhmaṇo bhagavantaṁ gāthāya ajjhabhāsi:

[¶8] “You claim to be a farmer,
but I don’t see you farming.
Tell me how you’re a farmer when asked:
how am I to recognize your farming?”

> Pali: “Kassako paṭijānāsi,
na ca passāmi te kasiṁ;
Kassako pucchito brūhi,
kathaṁ jānemu taṁ kasin”ti.

[¶9] “Faith is my seed, fervor my rain,
and wisdom is my yoke and plough.
Conscience is my draft-pole, mind my strap,
mindfulness my plowshare and goad.

> Pali: “Saddhā bījaṁ tapo vuṭṭhi,
paññā me yuganaṅgalaṁ;
Hirī īsā mano yottaṁ,
sati me phālapācanaṁ.

[¶10] Guarded in body and speech,
I restrict my intake of food.
I use truth as my scythe,
and gentleness is my release.

> Pali: Kāyagutto vacīgutto,
āhāre udare yato;
Saccaṁ karomi niddānaṁ,
soraccaṁ me pamocanaṁ.

[¶11] Energy is my harnessed beast,
transporting me to sanctuary from the yoke.
Without turning back, it goes
to where there is no sorrow.

> Pali: Vīriyaṁ me dhuradhorayhaṁ,
yogakkhemādhivāhanaṁ;
Gacchati anivattantaṁ,
yattha gantvā na socati.

[¶12] That’s how to do the farming
that has freedom from death as its fruit.
When you finish this farming
you’re released from all suffering.”

> Pali: Evamesā kasī kaṭṭhā,
sā hoti amatapphalā;
Etaṁ kasiṁ kasitvāna,
sabbadukkhā pamuccatī”ti.

[¶13] “May the worthy Gotama eat! The worthy one is a farmer. For the worthy Gotama does the farming that has freedom from death as its fruit.”

> Pali: “Bhuñjatu bhavaṁ gotamo. Kassako bhavaṁ. Yañhi bhavaṁ gotamo amatapphalampi kasiṁ kasatī”ti.

[¶14] “Food enchanted by a verse isn’t fit for me to eat.
That’s not the principle of those who see, brahmin.
The Buddhas cast aside things enchanted with verses.
Since there is such a principle, brahmin, <j>that’s how they live.

> Pali: “Gāthābhigītaṁ me abhojaneyyaṁ,
Sampassataṁ brāhmaṇa nesa dhammo;
Gāthābhigītaṁ panudanti buddhā,
Dhamme sati brāhmaṇa vuttiresā.

[¶15] Serve with other food and drink
the consummate one, the great seer,
with defilements ended and remorse stilled.
For he is the field for the seeker of merit.”

> Pali: Aññena ca kevalinaṁ mahesiṁ,
Khīṇāsavaṁ kukkuccavūpasantaṁ;
Annena pānena upaṭṭhahassu,
Khettañhi taṁ puññapekkhassa hotī”ti.

[¶16] When he had spoken, the brahmin Bhāradvāja the Farmer said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, kasibhāradvājo brāhmaṇo bhagavantaṁ etadavoca: “abhikkantaṁ, bho gotama …pe… ajjatagge pāṇupetaṁ saraṇaṁ gatan”ti.

[¶17] SN 7.12 · With Udaya

> Pali: SN 7.12 · Udayasutta

[¶18] At Sāvatthī.

> Pali: Sāvatthinidānaṁ.

[¶19] Then the Buddha robed up in the morning and, taking his bowl and robe, went to the home of the brahmin Udaya. Then Udaya filled the Buddha’s bowl with rice. The next day … Udaya again filled the Buddha’s bowl with rice.

> Pali: Atha kho bhagavā pubbaṇhasamayaṁ nivāsetvā pattacīvaramādāya yena udayassa brāhmaṇassa nivesanaṁ tenupasaṅkami. Atha kho udayo brāhmaṇo bhagavato pattaṁ odanena pūresi. Dutiyampi kho bhagavā pubbaṇhasamayaṁ nivāsetvā pattacīvaramādāya yena udayassa brāhmaṇassa nivesanaṁ tenupasaṅkami …pe…

[¶20] But when he had filled the Buddha’s bowl on the third day, he said to the Buddha, “This ascetic Gotama is such a drag! He keeps coming back again and again!”

> Pali: tatiyampi kho udayo brāhmaṇo bhagavato pattaṁ odanena pūretvā bhagavantaṁ etadavoca: “pakaṭṭhakoyaṁ samaṇo gotamo punappunaṁ āgacchatī”ti.

[¶21] “Again and again, they sow the seed;
again and again, the king of the heavens sends rain;
again and again, farmers plough the field;
again and again, grain is produced for the nation.

> Pali: “Punappunañceva vapanti bījaṁ,
Punappunaṁ vassati devarājā;
Punappunaṁ khettaṁ kasanti kassakā,
Punappunaṁ dhaññamupeti raṭṭhaṁ.

[¶22] Again and again, the beggars beg;
again and again, the donors give.
Again and again, when the donors have given,
again and again, they take their place in heaven.

> Pali: Punappunaṁ yācakā yācayanti,
Punappunaṁ dānapatī dadanti;
Punappunaṁ dānapatī daditvā,
Punappunaṁ saggamupenti ṭhānaṁ.

[¶23] Again and again, dairy farmers milk;
again and again, a calf cleaves to its mother;
again and again, oppressing and intimidating,
that dullard returns to the womb again and again.

> Pali: Punappunaṁ khīranikā duhanti,
Punappunaṁ vaccho upeti mātaraṁ;
Punappunaṁ kilamati phandati ca,
Punappunaṁ gabbhamupeti mando.

[¶24] Again and again, you’re reborn and die;
again and again, you get carried to a charnel ground.
But when they’ve gained the path <j>for no further rebirth,
one of vast wisdom is not reborn again and again.”

> Pali: Punappunaṁ jāyati mīyati ca,
Punappunaṁ sivathikaṁ haranti;
Maggañca laddhā apunabbhavāya,
Na punappunaṁ jāyati bhūripañño”ti.

[¶25] When he had spoken, the brahmin Udaya said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, udayo brāhmaṇo bhagavantaṁ etadavoca: “abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶26] SN 7.13 · With Devahita

> Pali: SN 7.13 · Devahitasutta

[¶27] At Sāvatthī.

> Pali: Sāvatthinidānaṁ.

[¶28] Now at that time the Buddha was afflicted by winds. Venerable Upavāṇa was his carer.

> Pali: Tena kho pana samayena bhagavā vātehābādhiko hoti; āyasmā ca upavāṇo bhagavato upaṭṭhāko hoti.

[¶29] Then the Buddha said to Upavāṇa, “Go on then, Upavāṇa, find some hot water for me.”

> Pali: Atha kho bhagavā āyasmantaṁ upavāṇaṁ āmantesi: “iṅgha me tvaṁ, upavāṇa, uṇhodakaṁ jānāhī”ti.

[¶30] “Yes, sir,” replied Upavāṇa. He robed up, and, taking his bowl and robe, went to the home of the brahmin Devahita, and stood silently to one side.

> Pali: “Evaṁ, bhante”ti kho āyasmā upavāṇo bhagavato paṭissutvā nivāsetvā pattacīvaramādāya yena devahitassa brāhmaṇassa nivesanaṁ tenupasaṅkami; upasaṅkamitvā tuṇhībhūto ekamantaṁ aṭṭhāsi.

[¶31] Devahita saw him standing there and addressed him in verse:

> Pali: Addasā kho devahito brāhmaṇo āyasmantaṁ upavāṇaṁ tuṇhībhūtaṁ ekamantaṁ ṭhitaṁ. Disvāna āyasmantaṁ upavāṇaṁ gāthāya ajjhabhāsi:

[¶32] “Silent stands the worthy one,
shaven, wrapped in his outer robe.
What do you want? What are you looking for?
What have you come here to ask for?”

> Pali: “Tuṇhībhūto bhavaṁ tiṭṭhaṁ,
muṇḍo saṅghāṭipāruto;
Kiṁ patthayāno kiṁ esaṁ,
kiṁ nu yācitumāgato”ti.

[¶33] “The perfected one, the Holy One in the world,
the sage is afflicted by winds.
If there’s hot water,
give it to the sage, brahmin.

> Pali: “Arahaṁ sugato loke,
vātehābādhiko muni;
Sace uṇhodakaṁ atthi,
munino dehi brāhmaṇa.

[¶34] I wish to bring it to the one
who is esteemed by the estimable,
honored by the honorable,
venerated by the venerable.”

> Pali: Pūjito pūjaneyyānaṁ,
sakkareyyāna sakkato;
Apacito apaceyyānaṁ,
tassa icchāmi hātave”ti.

[¶35] Then Devahita had a man fetch a carrying-pole with hot water. He also presented Upavāṇa with a jar of molasses.

> Pali: Atha kho devahito brāhmaṇo uṇhodakassa kājaṁ purisena gāhāpetvā phāṇitassa ca puṭaṁ āyasmato upavāṇassa pādāsi.

[¶36] Then Venerable Upavāṇa went up to the Buddha and bathed him with the hot water. Then he stirred molasses into hot water and presented it to the Buddha. Then the Buddha’s illness died down.

> Pali: Atha kho āyasmā upavāṇo yena bhagavā tenupasaṅkami; upasaṅkamitvā bhagavantaṁ uṇhodakena nhāpetvā uṇhodakena phāṇitaṁ āloletvā bhagavato pādāsi. Atha kho bhagavato ābādho paṭippassambhi.

[¶37] Then the brahmin Devahita went up to the Buddha, and exchanged greetings with him. When the greetings and polite conversation were over, he sat down to one side, and addressed the Buddha in verse:

> Pali: Atha kho devahito brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi. Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho devahito brāhmaṇo bhagavantaṁ gāthāya ajjhabhāsi:

[¶38] “Where should you give an available gift?
Where is a gift very fruitful?
How does one who is donating
ensure the success of their religious donation?”

> Pali: “Kattha dajjā deyyadhammaṁ,
kattha dinnaṁ mahapphalaṁ;
Kathañhi yajamānassa,
kathaṁ ijjhati dakkhiṇā”ti.

[¶39] “One who knows their past lives,
sees heaven and places of loss,
and has attained the ending of rebirth,
is a sage of perfect insight.

> Pali: “Pubbenivāsaṁ yo vedī,
saggāpāyañca passati;
Atho jātikkhayaṁ patto,
abhiññāvosito muni.

[¶40] Here you should give an available gift;
what’s given here is very fruitful.
That’s how a sponsor of sacrifices
ensures the success of their religious donation.”

> Pali: Ettha dajjā deyyadhammaṁ,
ettha dinnaṁ mahapphalaṁ;
Evañhi yajamānassa,
evaṁ ijjhati dakkhiṇā”ti.

[¶41] When he had spoken, the brahmin Devahita said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, devahito brāhmaṇo bhagavantaṁ etadavoca: “abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶42] SN 7.14 · A well-to-do brahmin

> Pali: SN 7.14 · Mahāsālasutta

[¶43] At Sāvatthī.

> Pali: Sāvatthinidānaṁ.

[¶44] Then a certain well-to-do brahmin, shabby, wearing a shabby cloak, went up to the Buddha, and exchanged greetings with him.

> Pali: Atha kho aññataro brāhmaṇamahāsālo lūkho lūkhapāvuraṇo yena bhagavā tenupasaṅkami; upasaṅkamitvā bhagavatā saddhiṁ sammodi.

[¶45] When the greetings and polite conversation were over, he sat down to one side. The Buddha said to him, “Brahmin, why are you so shabby, wearing a shabby cloak?”

> Pali: Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho taṁ brāhmaṇamahāsālaṁ bhagavā etadavoca: “kiṁ nu tvaṁ, brāhmaṇa, lūkho lūkhapāvuraṇo”ti?

[¶46] “Worthy Gotama, I have four sons. At their wives’ bidding they expelled me from my house.”

> Pali: “Idha me, bho gotama, cattāro puttā. Te maṁ dārehi sampuccha gharā nikkhāmentī”ti.

[¶47] “Well then, brahmin, memorize these verses and recite them to your sons when you are all seated in the council hall with a large crowd.

> Pali: “Tena hi tvaṁ, brāhmaṇa, imā gāthāyo pariyāpuṇitvā sabhāyaṁ mahājanakāye sannipatite puttesu ca sannisinnesu bhāsassu:

[¶48] ‘I was overjoyed when they were born,
and wished prosperity for them.
But at their wives’ bidding they chased me out,
like hounds after hogs.

> Pali: ‘Yehi jātehi nandissaṁ,
yesañca bhavamicchisaṁ;
Te maṁ dārehi sampuccha,
sāva vārenti sūkaraṁ.

[¶49] It turns out they’re wicked, those nasty men,
though they called me their dear old Dad.
They’re monsters in the shape of sons,
throwing me out as I’ve grown old.

> Pali: Asantā kira maṁ jammā,
tāta tātāti bhāsare;
Rakkhasā puttarūpena,
te jahanti vayogataṁ.

[¶50] Like an old, useless horse
led away from its fodder,
the elderly father of those kids
begs for alms at others’ homes.

> Pali: Assova jiṇṇo nibbhogo,
khādanā apanīyati;
Bālakānaṁ pitā thero,
parāgāresu bhikkhati.

[¶51] Even my staff is better
than those disobedient sons,
for it wards off a wild bull,
and even a wild dog.

> Pali: Daṇḍova kira me seyyo,
yañce puttā anassavā;
Caṇḍampi goṇaṁ vāreti,
atho caṇḍampi kukkuraṁ.

[¶52] It goes before me in the dark;
in deep waters it finds a footing.
By the wonderful power of this staff,
when I stumble, I stand firm again.’”

> Pali: Andhakāre pure hoti,
gambhīre gādhamedhati;
Daṇḍassa ānubhāvena,
khalitvā patitiṭṭhatī’”ti.

[¶53] Having memorized those verses in the Buddha’s presence, the brahmin recited them to his sons when they were all seated in the council hall with a large crowd. …

> Pali: Atha kho so brāhmaṇamahāsālo bhagavato santike imā gāthāyo pariyāpuṇitvā sabhāyaṁ mahājanakāye sannipatite puttesu ca sannisinnesu abhāsi:

[¶54] > Pali: “Yehi jātehi nandissaṁ,
yesañca bhavamicchisaṁ;
Te maṁ dārehi sampuccha,
sāva vārenti sūkaraṁ.

[¶55] > Pali: Asantā kira maṁ jammā,
tāta tātāti bhāsare;
Rakkhasā puttarūpena,
te jahanti vayogataṁ.

[¶56] > Pali: Assova jiṇṇo nibbhogo,
khādanā apanīyati;
Bālakānaṁ pitā thero,
parāgāresu bhikkhati.

[¶57] > Pali: Daṇḍova kira me seyyo,
yañce puttā anassavā;
Caṇḍampi goṇaṁ vāreti,
atho caṇḍampi kukkuraṁ.

[¶58] > Pali: Andhakāre pure hoti,
gambhīre gādhamedhati;
Daṇḍassa ānubhāvena,
khalitvā patitiṭṭhatī”ti.

[¶59] Then the brahmin’s sons led him back home, bathed him, and each clothed him with a fine pair of garments. Then the brahmin, taking one pair of garments, went to the Buddha and exchanged greetings with him. When the greetings and polite conversation were over, he sat down to one side and said to the Buddha:

> Pali: Atha kho naṁ brāhmaṇamahāsālaṁ puttā gharaṁ netvā nhāpetvā paccekaṁ dussayugena acchādesuṁ. Atha kho so brāhmaṇamahāsālo ekaṁ dussayugaṁ ādāya yena bhagavā tenupasaṅkami; upasaṅkamitvā bhagavatā saddhiṁ sammodi. Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho brāhmaṇamahāsālo bhagavantaṁ etadavoca:

[¶60] “Worthy Gotama, we brahmins seek a fee for our tutor. May the worthy Gotama please accept my tutor’s fee!” So the Buddha accepted it out of sympathy. Then the well-to-do brahmin said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: “mayaṁ, bho gotama, brāhmaṇā nāma ācariyassa ācariyadhanaṁ pariyesāma. Paṭiggaṇhatu me bhavaṁ gotamo ācariyadhanan”ti. Paṭiggahesi bhagavā anukampaṁ upādāya. Atha kho so brāhmaṇamahāsālo bhagavantaṁ etadavoca: “abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶61] SN 7.15 · Stuck-Up

> Pali: SN 7.15 · Mānatthaddhasutta

[¶62] At Sāvatthī.

> Pali: Sāvatthinidānaṁ.

[¶63] Now at that time a brahmin named Stuck-Up was residing in Sāvatthī. He didn’t bow to his mother or father, his tutor, or his oldest brother. Now, at that time the Buddha was teaching Dhamma, surrounded by a large assembly.

> Pali: Tena kho pana samayena mānatthaddho nāma brāhmaṇo sāvatthiyaṁ paṭivasati. So neva mātaraṁ abhivādeti, na pitaraṁ abhivādeti, na ācariyaṁ abhivādeti, na jeṭṭhabhātaraṁ abhivādeti. Tena kho pana samayena bhagavā mahatiyā parisāya parivuto dhammaṁ deseti.

[¶64] Then Stuck-Up thought, “The ascetic Gotama is teaching Dhamma, surrounded by a large assembly. Why don’t I approach him? If he speaks to me, I’ll speak to him. But if he doesn’t speak, neither will I.”

> Pali: Atha kho mānatthaddhassa brāhmaṇassa etadahosi: “ayaṁ kho samaṇo gotamo mahatiyā parisāya parivuto dhammaṁ deseti. Yannūnāhaṁ yena samaṇo gotamo tenupasaṅkameyyaṁ. Sace maṁ samaṇo gotamo ālapissati, ahampi taṁ ālapissāmi. No ce maṁ samaṇo gotamo ālapissati, ahampi nālapissāmī”ti.

[¶65] Then the brahmin Stuck-Up went up to the Buddha, and stood silently to one side. But the Buddha didn’t speak to him.

> Pali: Atha kho mānatthaddho brāhmaṇo yena bhagavā tenupasaṅkami; upasaṅkamitvā tuṇhībhūto ekamantaṁ aṭṭhāsi. Atha kho bhagavā taṁ nālapi.

[¶66] Then Stuck-Up thought, “This ascetic Gotama knows nothing!” And he wanted to go back from there right away.

> Pali: Atha kho mānatthaddho brāhmaṇo: “nāyaṁ samaṇo gotamo kiñci jānātī”ti tatova puna nivattitukāmo ahosi.

[¶67] Then the Buddha, knowing Stuck-Up’s train of thought, addressed him in verse:

> Pali: Atha kho bhagavā mānatthaddhassa brāhmaṇassa cetasā cetoparivitakkamaññāya mānatthaddhaṁ brāhmaṇaṁ gāthāya ajjhabhāsi:

[¶68] “It’s not good to foster conceit
if you want what’s good for you, brahmin.
You should foster the goal
which brought you here.”

> Pali: “Na mānaṁ brāhmaṇa sādhu,
atthikassīdha brāhmaṇa;
Yena atthena āgacchi,
tamevamanubrūhaye”ti.

[¶69] Then Stuck-Up thought, “The ascetic Gotama knows my mind!” He bowed with his head to the Buddha’s feet, caressing them and covering them with kisses, and pronounced his name: “Worthy Gotama, I am Stuck-Up! I am Stuck-Up!”

> Pali: Atha kho mānatthaddho brāhmaṇo: “cittaṁ me samaṇo gotamo jānātī”ti tattheva bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati, nāmañca sāveti: “mānatthaddhāhaṁ, bho gotama, mānatthaddhāhaṁ, bho gotamā”ti.

[¶70] Then that assembly was stunned: “Oh lord, how incredible, how amazing! This brahmin Stuck-Up doesn’t bow to his mother or father, his tutor, or his oldest brother. Yet he shows such utmost deference to the ascetic Gotama!”

> Pali: Atha kho sā parisā abbhutavittajātā ahosi: “acchariyaṁ vata bho, abbhutaṁ vata bho. Ayañhi mānatthaddho brāhmaṇo neva mātaraṁ abhivādeti, na pitaraṁ abhivādeti, na ācariyaṁ abhivādeti, na jeṭṭhabhātaraṁ abhivādeti; atha ca pana samaṇe gotame evarūpaṁ paramanipaccakāraṁ karotī”ti.

[¶71] Then the Buddha said to the brahmin Stuck-Up, “Enough, brahmin. Get up, and take your own seat. For your mind has confidence in me.”

> Pali: Atha kho bhagavā mānatthaddhaṁ brāhmaṇaṁ etadavoca: “alaṁ, brāhmaṇa, uṭṭhehi, sake āsane nisīda. Yato te mayi cittaṁ pasannan”ti.

[¶72] Then Stuck-Up took his seat and said to the Buddha:

> Pali: Atha kho mānatthaddho brāhmaṇo sake āsane nisīditvā bhagavantaṁ gāthāya ajjhabhāsi:

[¶73] “Regarding whom should you not be conceited?
Who should you respect?
Who should you esteem?
Who is it good to venerate properly?”

> Pali: “Kesu na mānaṁ kayirātha,
kesu cassa sagāravo;
Kyassa apacitā assu,
kyassu sādhu supūjitā”ti.

[¶74] “Your mother and father,
and also your oldest brother,
with tutor as fourth.
Regarding these you should not be conceited.
They are who you should respect.
They are who you should esteem.
And they’re who it’s good to venerate properly.

> Pali: “Mātari pitari cāpi,
atho jeṭṭhamhi bhātari;
Ācariye catutthamhi,
tesu na mānaṁ kayirātha;
Tesu assa sagāravo,
tyassa apacitā assu;
Tyassu sādhu supūjitā.

[¶75] And when with bent knee, not stiff with conceit,
show supreme reverence for
the perfected ones—cooled,
their task complete, free of defilements.”

> Pali: Arahante sītībhūte,
katakicce anāsave;
Nihacca mānaṁ athaddho,
te namasse anuttare”ti.

[¶76] When he had spoken, the brahmin Stuck-Up said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, mānatthaddho brāhmaṇo bhagavantaṁ etadavoca: “abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶77] SN 7.16 · The Contraphile

> Pali: SN 7.16 · Paccanīkasutta

[¶78] At Sāvatthī.

> Pali: Sāvatthinidānaṁ.

[¶79] Now at that time a brahmin named Contraphile, who loved contradiction, was residing in Sāvatthī.

> Pali: Tena kho pana samayena paccanīkasāto nāma brāhmaṇo sāvatthiyaṁ paṭivasati.

[¶80] Then Contraphile thought, “Why don’t I go to the ascetic Gotama and contradict everything he says?”

> Pali: Atha kho paccanīkasātassa brāhmaṇassa etadahosi: “yannūnāhaṁ yena samaṇo gotamo tenupasaṅkameyyaṁ. Yaṁ yadeva samaṇo gotamo bhāsissati taṁ tadevassāhaṁ paccanīkāssan”ti.

[¶81] At that time the Buddha was walking mindfully in the open air.

> Pali: Tena kho pana samayena bhagavā abbhokāse caṅkamati.

[¶82] Then the brahmin Contraphile went up to the Buddha, and said to him as he was walking, “Ascetic, preach the Dhamma.”

> Pali: Atha kho paccanīkasāto brāhmaṇo yena bhagavā tenupasaṅkami; upasaṅkamitvā bhagavantaṁ caṅkamantaṁ etadavoca: “bhaṇa samaṇadhamman”ti.

[¶83] “Fine words aren’t easy to understand
by a lover of contradiction,
whose mind is tainted
and full of aggression.

> Pali: “Na paccanīkasātena,
suvijānaṁ subhāsitaṁ;
Upakkiliṭṭhacittena,
sārambhabahulena ca.

[¶84] But when you’ve dispelled aggression,
and your suspicious mind,
and you’ve got rid of resentment,
then you’ll understand fine words.”

> Pali: Yo ca vineyya sārambhaṁ,
appasādañca cetaso;
Āghātaṁ paṭinissajja,
sa ve jaññā subhāsitan”ti.

[¶85] When he had spoken, the brahmin Contraphile said to the Buddha, “Excellent, worthy Gotama! Excellent! … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, paccanīkasāto brāhmaṇo bhagavantaṁ etadavoca: “abhikkantaṁ, bho gotama, abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶86] SN 7.17 · The Builder

> Pali: SN 7.17 · Navakammikasutta

[¶87] At one time the Buddha was staying in the land of the Kosalans in a certain forest grove.

> Pali: Ekaṁ samayaṁ bhagavā kosalesu viharati aññatarasmiṁ vanasaṇḍe.

[¶88] Now at that time the brahmin Bhāradvāja the Builder was having some building work done in that jungle thicket. He saw the Buddha sitting down cross-legged at the root of a certain sal tree, his body set straight, and mindfulness brought to the present.

> Pali: Tena kho pana samayena navakammikabhāradvājo brāhmaṇo tasmiṁ vanasaṇḍe kammantaṁ kārāpeti. Addasā kho navakammikabhāradvājo brāhmaṇo bhagavantaṁ aññatarasmiṁ sālarukkhamūle nisinnaṁ pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.

[¶89] Seeing this, it occurred to him, “I enjoy having this building work done here in the jungle. I wonder what the ascetic Gotama enjoys having done?”

> Pali: Disvānassa etadahosi: “ahaṁ kho imasmiṁ vanasaṇḍe kammantaṁ kārāpento ramāmi. Ayaṁ samaṇo gotamo kiṁ kārāpento ramatī”ti?

[¶90] Then Bhāradvāja the Builder went up to the Buddha and addressed him in verse:

> Pali: Atha kho navakammikabhāradvājo brāhmaṇo yena bhagavā tenupasaṅkami. upasaṅkamitvā bhagavantaṁ gāthāya ajjhabhāsi:

[¶91] “What kind of works are done by you,
a mendicant in the sal jungle?
How do you find enjoyment
alone in the wilderness, Gotama?”

> Pali: “Ke nu kammantā karīyanti,
bhikkhu sālavane tava;
Yadekako araññasmiṁ,
ratiṁ vindati gotamo”ti.

[¶92] “There’s nothing I need do in the jungle;
my jungle’s cut at the root, it’s withered away.
Free of snarls and thorns in the jungle,
I enjoy solitude, having given up discontent.”

> Pali: “Na me vanasmiṁ karaṇīyamatthi,
Ucchinnamūlaṁ me vanaṁ visūkaṁ;
Svāhaṁ vane nibbanatho visallo,
Eko rame aratiṁ vippahāyā”ti.

[¶93] When he had spoken, the brahmin Bhāradvāja the Builder said to the Buddha, “Excellent, worthy Gotama … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, navakammikabhāradvājo brāhmaṇo bhagavantaṁ etadavoca: “abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶94] SN 7.18 · Collecting Firewood

> Pali: SN 7.18 · Kaṭṭhahārasutta

[¶95] At one time the Buddha was staying in the land of the Kosalans in a certain forest grove.

> Pali: Ekaṁ samayaṁ bhagavā kosalesu viharati aññatarasmiṁ vanasaṇḍe.

[¶96] Then several students, pupils of one of the Bhāradvāja brahmins, approached a forest grove while collecting firewood. They saw the Buddha sitting down cross-legged at the root of a certain sal tree, his body set straight, and mindfulness brought to the present. Seeing this, they went up to Bhāradvāja and said to him, “Please sir, you should know this. In such-and-such forest grove the ascetic Gotama is sitting down cross-legged, his body set straight, and mindfulness brought to the present.”

> Pali: Tena kho pana samayena aññatarassa bhāradvājagottassa brāhmaṇassa sambahulā antevāsikā kaṭṭhahārakā māṇavakā yena vanasaṇḍo tenupasaṅkamiṁsu; upasaṅkamitvā addasaṁsu bhagavantaṁ tasmiṁ vanasaṇḍe nisinnaṁ pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā. Disvāna yena bhāradvājagotto brāhmaṇo tenupasaṅkamiṁsu; upasaṅkamitvā bhāradvājagottaṁ brāhmaṇaṁ etadavocuṁ: “yagghe bhavaṁ jāneyyāsi. Asukasmiṁ vanasaṇḍe samaṇo nisinno pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā”.

[¶97] Then Bhāradvāja together with those young students went to that forest grove where he saw the Buddha sitting down cross-legged, his body set straight, and mindfulness brought to the present.

> Pali: Atha kho bhāradvājagotto brāhmaṇo tehi māṇavakehi saddhiṁ yena so vanasaṇḍo tenupasaṅkami. Addasā kho bhagavantaṁ tasmiṁ vanasaṇḍe nisinnaṁ pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.

[¶98] He went up to the Buddha and addressed him in verse:

> Pali: Disvāna yena bhagavā tenupasaṅkami; upasaṅkamitvā bhagavantaṁ gāthāya ajjhabhāsi:

[¶99] “Deep in the jungle so full of terrors,
you’ve plunged into the empty, desolate wilderness.
Still, steady, and graceful:
how beautifully you meditate, mendicant!

> Pali: “Gambhīrarūpe bahubherave vane,
Suññaṁ araññaṁ vijanaṁ vigāhiya;
Aniñjamānena ṭhitena vaggunā,
Sucārurūpaṁ vata bhikkhu jhāyasi.

[¶100] Where there is no song or music,
a lonely sage resorts to the wilderness.
This strikes me as an amazing thing,
that you dwell so joyfully alone in the jungle.

> Pali: Na yattha gītaṁ napi yattha vāditaṁ,
Eko araññe vanavassito muni;
Accherarūpaṁ paṭibhāti maṁ idaṁ,
Yadekako pītimano vane vase.

[¶101] I suppose you wish to be reborn in the company
of the supreme world-sovereign <j>of the Third Heaven.
Is that why you resort to the desolate wilderness,
to practice fervor for attaining divinity?”

> Pali: Maññāmahaṁ lokādhipatisahabyataṁ,
Ākaṅkhamāno tidivaṁ anuttaraṁ;
Kasmā bhavaṁ vijanamaraññamassito,
Tapo idha kubbasi brahmapattiyā”ti.

[¶102] “Any wishes and hopes that are always attached
to the many and various realms—
the prayers sprung from the root of unknowing—
I’ve eliminated them all down to the root.

> Pali: “Yā kāci kaṅkhā abhinandanā vā,
Anekadhātūsu puthū sadāsitā;
Aññāṇamūlappabhavā pajappitā,
Sabbā mayā byantikatā samūlikā.

[¶103] So I’m wishless, unattached, uninvolved;
amongst all things, my vision is clear.
I’ve attained the state of grace, <j>the supreme awakening;
I meditate alone, brahmin, and self-assured.”

> Pali: Svāhaṁ akaṅkho asito anūpayo,
Sabbesu dhammesu visuddhadassano;
Pappuyya sambodhimanuttaraṁ sivaṁ,
Jhāyāmahaṁ brahma raho visārado”ti.

[¶104] When he had spoken, Bhāradvāja said to the Buddha, “Excellent, worthy Gotama! Excellent! … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, bhāradvājagotto brāhmaṇo bhagavantaṁ etadavoca: “abhikkantaṁ, bho gotama, abhikkantaṁ, bho gotama …pe… ajjatagge pāṇupetaṁ saraṇaṁ gatan”ti.

[¶105] SN 7.19 · The Brahmin Who Provided for His Mother

> Pali: SN 7.19 · Mātuposakasutta

[¶106] At Sāvatthī.

> Pali: Sāvatthinidānaṁ.

[¶107] Then a brahmin who provided for his mother went up to the Buddha, and exchanged greetings with him.

> Pali: Atha kho mātuposako brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

[¶108] When the greetings and polite conversation were over, he sat down to one side and said to the Buddha, “Worthy Gotama, I seek alms by legitimate means, which I use to provide for my mother and father. In doing so, am I doing my duty?”

> Pali: Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho mātuposako brāhmaṇo bhagavantaṁ etadavoca: “ahañhi, bho gotama, dhammena bhikkhaṁ pariyesāmi, dhammena bhikkhaṁ pariyesitvā mātāpitaro posemi. Kaccāhaṁ, bho gotama, evaṅkārī kiccakārī homī”ti?

[¶109] “Indeed, brahmin, in so doing you are doing your duty. Whoever seeks alms by legitimate means, and uses them to provide for their mother and father brims with much merit.

> Pali: “Taggha tvaṁ, brāhmaṇa, evaṅkārī kiccakārī hosi. Yo kho, brāhmaṇa, dhammena bhikkhaṁ pariyesati, dhammena bhikkhaṁ pariyesitvā mātāpitaro poseti, bahuṁ so puññaṁ pasavatīti.

[¶110] A mortal provides for their mother
and father by legitimate means;
because they serve
their parents like this,
they’re praised in this life by the astute,
and they depart to rejoice in heaven.”

> Pali: Yo mātaraṁ pitaraṁ vā,
macco dhammena posati;
Tāya naṁ pāricariyāya,
mātāpitūsu paṇḍitā;
Idheva naṁ pasaṁsanti,
pecca sagge pamodatī”ti.

[¶111] When he said this, the brahmin who provided for his mother said to the Buddha, “Excellent, worthy Gotama! Excellent! … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, mātuposako brāhmaṇo bhagavantaṁ etadavoca: “abhikkantaṁ, bho gotama, abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶112] SN 7.20 · An Almsman

> Pali: SN 7.20 · Bhikkhakasutta

[¶113] At Sāvatthī.

> Pali: Sāvatthinidānaṁ.

[¶114] Then a brahmin almsman went up to the Buddha, and exchanged greetings with him.

> Pali: Atha kho bhikkhako brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

[¶115] When the greetings and polite conversation were over, he sat down to one side and said to the Buddha, “Worthy Gotama, both you and I are almsmen. What, then, is the difference between us?”

> Pali: Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho bhikkhako brāhmaṇo bhagavantaṁ etadavoca: “ahampi kho, bho gotama, bhikkhako, bhavampi bhikkhako, idha no kiṁ nānākaraṇan”ti?

[¶116] “You don’t become an almsman
just by begging alms from others.
One who has undertaken domestic duties
has not yet become a mendicant.

> Pali: “Na tena bhikkhako hoti,
yāvatā bhikkhate pare;
Vissaṁ dhammaṁ samādāya,
bhikkhu hoti na tāvatā.

[¶117] But one living a spiritual life
who has banished both merit and evil,
and wanders having appraised the world,
is said to be a mendicant.”

> Pali: Yodha puññañca pāpañca,
bāhitvā brahmacariyaṁ;
Saṅkhāya loke carati,
sa ve bhikkhūti vuccatī”ti.

[¶118] When he had spoken, the brahmin almsman said to the Buddha, “Excellent, worthy Gotama! Excellent! … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, bhikkhako brāhmaṇo bhagavantaṁ etadavoca: “abhikkantaṁ, bho gotama, abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶119] SN 7.21 · With Saṅgārava

> Pali: SN 7.21 · Saṅgāravasutta

[¶120] At Sāvatthī.

> Pali: Sāvatthinidānaṁ.

[¶121] Now at that time there was a brahmin named Saṅgārava staying in Sāvatthī. He practiced purification by water, believing in purification by water. He lived committed to the practice of immersing himself in water at daybreak and dusk. Then Venerable Ānanda robed up in the morning and, taking his bowl and robe, entered Sāvatthī for alms.

> Pali: Tena kho pana samayena saṅgāravo nāma brāhmaṇo sāvatthiyaṁ paṭivasati udakasuddhiko, udakena parisuddhiṁ pacceti, sāyaṁ pātaṁ udakorohanānuyogamanuyutto viharati. Atha kho āyasmā ānando pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.

[¶122] He wandered for alms in Sāvatthī. After the meal, on his return from almsround, he went to the Buddha, bowed, sat down to one side, and said to him, “Sir, there is a brahmin named Saṅgārava staying in Sāvatthī. He practices purification by water, believing in purification by water. He lives devoted to ritual bathing at daybreak and dusk. Please visit him at his home out of sympathy.” The Buddha consented with silence.

> Pali: Sāvatthiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca: “idha, bhante, saṅgāravo nāma brāhmaṇo sāvatthiyaṁ paṭivasati udakasuddhiko, udakena suddhiṁ pacceti, sāyaṁ pātaṁ udakorohanānuyogamanuyutto viharati. Sādhu, bhante, bhagavā yena saṅgāravassa brāhmaṇassa nivesanaṁ tenupasaṅkamatu anukampaṁ upādāyā”ti. Adhivāsesi bhagavā tuṇhībhāvena.

[¶123] Then the Buddha robed up in the morning and, taking his bowl and robe, went to the home of the brahmin Saṅgārava, and sat down on the seat spread out. Then the brahmin Saṅgārava went up to the Buddha, and exchanged greetings with him.

> Pali: Atha kho bhagavā pubbaṇhasamayaṁ nivāsetvā pattacīvaramādāya yena saṅgāravassa brāhmaṇassa nivesanaṁ tenupasaṅkami; upasaṅkamitvā paññatte āsane nisīdi. Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

[¶124] When the greetings and polite conversation were over, he sat down to one side. The Buddha said to him, “Is it really true, brahmin, that you practice purification by water, believing in purification by water; that you live committed to the practice of immersing yourself in water at daybreak and dusk?”

> Pali: Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho saṅgāravaṁ brāhmaṇaṁ bhagavā etadavoca: “saccaṁ kira tvaṁ, brāhmaṇa, udakasuddhiko, udakena suddhiṁ paccesi, sāyaṁ pātaṁ udakorohanānuyogamanuyutto viharasī”ti?

[¶125] “Yes, worthy Gotama.”

> Pali: “Evaṁ, bho gotama”.

[¶126] “But brahmin, for what reason do you practice purification by water?”

> Pali: “Kiṁ pana tvaṁ, brāhmaṇa, atthavasaṁ sampassamāno udakasuddhiko, udakasuddhiṁ paccesi, sāyaṁ pātaṁ udakorohanānuyogamanuyutto viharasī”ti?

[¶127] “It’s because, Worthy Gotama, whatever bad deeds I’ve done during the day I rinse off by bathing at dusk; and whatever bad deeds I’ve done during the night, I rinse off by bathing at dawn. That’s the reason why I practice purification by water.”

> Pali: “Idha me, bho gotama, yaṁ divā pāpakammaṁ kataṁ hoti, taṁ sāyaṁ nhānena pavāhemi, yaṁ rattiṁ pāpakammaṁ kataṁ hoti taṁ pātaṁ nhānena pavāhemi. Imaṁ khvāhaṁ, bho gotama, atthavasaṁ sampassamāno udakasuddhiko, udakena suddhiṁ paccemi, sāyaṁ pātaṁ udakorohanānuyogamanuyutto viharāmī”ti.

[¶128] “The teaching is a lake, brahmin, <j>into which ethics are the stairs,
unclouded, praised by the fine to the good.
There the knowledge masters go to bathe,
and cross to the far shore with dry limbs.”

> Pali: “Dhammo rahado brāhmaṇa sīlatittho,
Anāvilo sabbhi sataṁ pasattho;
Yattha have vedaguno sinātā,
Anallagattāva taranti pāran”ti.

[¶129] When he had spoken, Saṅgārava said to the Buddha, “Excellent, worthy Gotama! Excellent! … From this day forth, may the worthy Gotama remember me as a lay follower who has gone for refuge for life.”

> Pali: Evaṁ vutte, saṅgāravo brāhmaṇo bhagavantaṁ etadavoca: “abhikkantaṁ, bho gotama, abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

[¶130] SN 7.22 · At Khomadussa

> Pali: SN 7.22 · Khomadussasutta

[¶131] So I have heard. At one time the Buddha was staying in the land of the Sakyans, where they have a town named Khomadussa.

> Pali: Evaṁ me sutaṁ— ekaṁ samayaṁ bhagavā sakkesu viharati khomadussaṁ nāmaṁ sakyānaṁ nigamo.

[¶132] Then the Buddha robed up in the morning and, taking his bowl and robe, entered Khomadussa for alms. Now at that time the brahmins and householders of Khomadussa were gathered in the council hall for some business, while a gentle rain drizzled down.

> Pali: Atha kho bhagavā pubbaṇhasamayaṁ nivāsetvā pattacīvaramādāya khomadussaṁ nigamaṁ piṇḍāya pāvisi. Tena kho pana samayena khomadussakā brāhmaṇagahapatikā sabhāyaṁ sannipatitā honti kenacideva karaṇīyena, devo ca ekamekaṁ phusāyati.

[¶133] Then the Buddha approached that council. The brahmins and householders saw the Buddha coming off in the distance, and said, “Who are these shavelings, these fake ascetics? Don’t they understand the council rules?”

> Pali: Atha kho bhagavā yena sā sabhā tenupasaṅkami. Addasaṁsu khomadussakā brāhmaṇagahapatikā bhagavantaṁ dūratova āgacchantaṁ. Disvāna etadavocuṁ: “ke ca muṇḍakā samaṇakā, ke ca sabhādhammaṁ jānissantī”ti?

[¶134] Then the Buddha addressed the brahmins and householders of Khomadussa in verse:

> Pali: Atha kho bhagavā khomadussake brāhmaṇagahapatike gāthāya ajjhabhāsi:

[¶135] “If good people are not present it is no true council;
and those whose speak against principle <j>are not good people.
Having given up greed, hate, and delusion,
speakers of principle are good people.”

> Pali: “Nesā sabhā yattha na santi santo,
Santo na te ye na vadanti dhammaṁ;
Rāgañca dosañca pahāya mohaṁ,
Dhammaṁ vadantā ca bhavanti santo”ti.

[¶136] When he had spoken, the brahmins and householders of Khomadussa said to the Buddha, “Excellent, worthy Gotama! Excellent! As if he were righting the overturned, or revealing the hidden, or pointing out the path to the lost, or lighting a lamp in the dark so people with clear eyes can see what’s there, worthy Gotama has made the teaching clear in many ways. We go for refuge to the worthy Gotama, to the teaching, and to the mendicant Saṅgha. From this day forth, may the worthy Gotama remember us as lay followers who have gone for refuge for life.”

> Pali: Evaṁ vutte, khomadussakā brāhmaṇagahapatikā bhagavantaṁ etadavocuṁ: “abhikkantaṁ, bho gotama, abhikkantaṁ, bho gotama. Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito. Ete mayaṁ bhavantaṁ gotamaṁ saraṇaṁ gacchāma dhammañca bhikkhusaṅghañca. Upāsake no bhavaṁ gotamo dhāretu ajjatagge pāṇupete saraṇaṁ gate”ti.

[¶137] > Pali: Upāsakavaggo dutiyo.

[¶138] > Pali: Tassuddānaṁ

[¶139] > Pali: Kasi udayo devahito,
Aññataramahāsālaṁ;
Mānatthaddhaṁ paccanīkaṁ,
Navakammi kaṭṭhahāraṁ;
Mātuposakaṁ bhikkhako,
Saṅgāravo ca khomadussena dvādasāti.

[¶140] The Linked Discourses with Brahmins are complete.

> Pali: Brāhmaṇasaṁyuttaṁ samattaṁ.