---
title: "Linked Discourses I: With Verses · Saṁyutta Nikāya · Sagāthāvagga"
author: "The Buddha"
translator: "Bhikkhu Sujato"
languages: [pi, en]
shelf: "Pali Canon"
section: 26 of 31
url: https://scriptura.si/works/pali-samyutta-nikaya-1/26/
cite: "The Buddha, tr. Bhikkhu Sujato, Linked Discourses I: With Verses · Saṁyutta Nikāya · Sagāthāvagga, section 26. Scriptura (scriptura.si), https://scriptura.si/works/pali-samyutta-nikaya-1/26/"
---

# Linked Discourses I: With Verses · Saṁyutta Nikāya · Sagāthāvagga

*The Buddha, tr. Bhikkhu Sujato*

The first book of the Linked Discourses: dialogues in verse with gods, Māra, nuns, brahmins and kings.

> Pali: the Mahāsaṅgīti Tipiṭaka (Buddha Jayanti edition, 2500), from SuttaCentral’s bilara-data, dedicated to the public domain (CC0).

> English: Bhikkhu Sujato, from SuttaCentral’s bilara-data, dedicated to the public domain (CC0). Notes are not included.

> Rows follow the segment numbers the two texts share, gathered into paragraphs; verse keeps its lines.

## 26. With Vaṅgīsa · SN 8.1–8.12

Source: https://scriptura.si/works/pali-samyutta-nikaya-1/26/ · cite a paragraph as https://scriptura.si/works/pali-samyutta-nikaya-1/26/#p-N

[¶0] SN 8.1 · Renounced

> Pali: SN 8.1 · Nikkhantasutta

[¶1] So I have heard. At one time Venerable Vaṅgīsa was staying near Āḷavī, at Āḷavī’s premier shrine, together with his mentor, Venerable Nigrodhakappa.

> Pali: Evaṁ me sutaṁ— ekaṁ samayaṁ āyasmā vaṅgīso āḷaviyaṁ viharati aggāḷave cetiye āyasmatā nigrodhakappena upajjhāyena saddhiṁ.

[¶2] Now at that time Vaṅgīsa was junior, recently gone forth. He had been left behind to look after the dwelling.

> Pali: Tena kho pana samayena āyasmā vaṅgīso navako hoti acirapabbajito ohiyyako vihārapālo.

[¶3] Then several women dressed in all their finery went to the monastery at Āḷavī’s premier shrine in order to inspect the dwelling. When Vaṅgīsa saw them he became dissatisfied, with lust infecting his mind.

> Pali: Atha kho sambahulā itthiyo samalaṅkaritvā yena aggāḷavako ārāmo tenupasaṅkamiṁsu vihārapekkhikāyo. Atha kho āyasmato vaṅgīsassa tā itthiyo disvā anabhirati uppajjati, rāgo cittaṁ anuddhaṁseti.

[¶4] Then he thought, “It’s my loss, my misfortune, that I’ve become dissatisfied, with lust infecting my mind. How is it possible for someone else to dispel my discontent and give rise to satisfaction? Why don’t I do it myself?”

> Pali: Atha kho āyasmato vaṅgīsassa etadahosi: “alābhā vata me, na vata me lābhā; dulladdhaṁ vata me, na vata me suladdhaṁ; yassa me anabhirati uppannā, rāgo cittaṁ anuddhaṁseti, taṁ kutettha labbhā, yaṁ me paro anabhiratiṁ vinodetvā abhiratiṁ uppādeyya. Yannūnāhaṁ attanāva attano anabhiratiṁ vinodetvā abhiratiṁ uppādeyyan”ti.

[¶5] Then, on the occasion of dispelling his own discontent and giving rise to satisfaction, he recited these verses:

> Pali: Atha kho āyasmā vaṅgīso attanāva attano anabhiratiṁ vinodetvā abhiratiṁ uppādetvā tāyaṁ velāyaṁ imā gāthāyo abhāsi:

[¶6] “Now that I’ve renounced
the lay life for homelessness,
I’m overrun
by the rude thoughts of the Dark One.

> Pali: “Nikkhantaṁ vata maṁ santaṁ,
agārasmānagāriyaṁ;
Vitakkā upadhāvanti,
pagabbhā kaṇhato ime.

[¶7] Even if a thousand warrior chiefs and great archers,
well trained, with strong bows,
were to completely surround me;
I would never flee.

> Pali: Uggaputtā mahissāsā,
sikkhitā daḷhadhammino;
Samantā parikireyyuṁ,
sahassaṁ apalāyinaṁ.

[¶8] And even if women come,
many more than that,
they won’t bother me,
for I stand firm in the teaching.

> Pali: Sacepi etato bhiyyo,
āgamissanti itthiyo;
Neva maṁ byādhayissanti,
dhamme samhi patiṭṭhitaṁ.

[¶9] I heard with my own ears
from the Buddha, Kinsman of the Sun,
about the path going to extinguishment;
that’s what delights my mind.

> Pali: Sakkhī hi me sutaṁ etaṁ,
buddhassādiccabandhuno;
Nibbānagamanaṁ maggaṁ,
tattha me nirato mano.

[¶10] Wicked One, if you come near me
as I meditate like this,
I’ll make sure that you, Death,
won’t even see the path I take.”

> Pali: Evañce maṁ viharantaṁ,
pāpima upagacchasi;
Tathā maccu karissāmi,
na me maggampi dakkhasī”ti.

[¶11] SN 8.2 · Dissatisfaction

> Pali: SN 8.2 · Aratīsutta

[¶12] At one time Venerable Vaṅgīsa was staying near Āḷavī, at Āḷavī’s premier shrine, together with his mentor, Venerable Nigrodhakappa.

> Pali: Ekaṁ samayaṁ …pe… āyasmā vaṅgīso āḷaviyaṁ viharati aggāḷave cetiye āyasmatā nigrodhakappena upajjhāyena saddhiṁ.

[¶13] Now at that time after Venerable Nigrodhakappa had finished his meal, on his return from almsround, he would enter his dwelling and not emerge for the rest of that day, or the next.

> Pali: Tena kho pana samayena āyasmā nigrodhakappo pacchābhattaṁ piṇḍapātapaṭikkanto vihāraṁ pavisati, sāyaṁ vā nikkhamati aparajju vā kāle.

[¶14] And at that time Venerable Vaṅgīsa became dissatisfied, as lust infected his mind.

> Pali: Tena kho pana samayena āyasmato vaṅgīsassa anabhirati uppannā hoti, rāgo cittaṁ anuddhaṁseti.

[¶15] Then he thought, “It’s my loss, my misfortune, that I’ve become dissatisfied, with lust infecting my mind. How is it possible for someone else to dispel my discontent and give rise to satisfaction? Why don’t I do it myself?”

> Pali: Atha kho āyasmato vaṅgīsassa etadahosi: “alābhā vata me, na vata me lābhā; dulladdhaṁ vata me, na vata me suladdhaṁ; yassa me anabhirati uppannā, rāgo cittaṁ anuddhaṁseti; taṁ kutettha labbhā, yaṁ me paro anabhiratiṁ vinodetvā abhiratiṁ uppādeyya. Yannūnāhaṁ attanāva attano anabhiratiṁ vinodetvā abhiratiṁ uppādeyyan”ti.

[¶16] Then, on the occasion of dispelling his own discontent and giving rise to satisfaction, he recited these verses:

> Pali: Atha kho āyasmā vaṅgīso attanāva attano anabhiratiṁ vinodetvā abhiratiṁ uppādetvā tāyaṁ velāyaṁ imā gāthāyo abhāsi:

[¶17] “Giving up desire and discontent,
along with all thoughts of domestic life,
they wouldn’t get snarled in anything;
unsnarled, undesiring: that’s a real mendicant.

> Pali: “Aratiñca ratiñca pahāya,
Sabbaso gehasitañca vitakkaṁ;
Vanathaṁ na kareyya kuhiñci,
Nibbanatho arato sa hi bhikkhu.

[¶18] Whatever here is included in form—
on earth, in the sky, or in planet’s deep—
wears out, it is all impermanent:
the self-examined live having comprehended this.

> Pali: Yamidha pathaviñca vehāsaṁ,
Rūpagatañca jagatogadhaṁ;
Kiñci parijīyati sabbamaniccaṁ,
Evaṁ samecca caranti mutattā.

[¶19] People are bound to their attachments,
to impingement of the seen and heard, <j>and to what is thought.
Unstirred, dispel desire for these things;
for one called ‘a sage’ does not cling to them.

> Pali: Upadhīsu janā gadhitāse,
Diṭṭhasute paṭighe ca mute ca;
Ettha vinodaya chandamanejo,
Yo ettha na limpati taṁ munimāhu.

[¶20] Trapped in the sixty wrong views, <j>full of their own opinions,
ordinary people are fixed in wrong principles.
But that mendicant wouldn’t join a sect,
still less would they utter lewd speech.

> Pali: Atha saṭṭhinissitā savitakkā,
Puthū janatāya adhammā niviṭṭhā;
Na ca vaggagatassa kuhiñci,
No pana duṭṭhullabhāṇī sa bhikkhu.

[¶21] Proficient, long serene,
free of deceit, alert, without envy,
the sage has reached the state of peace;
quenched, he awaits his time.”

> Pali: Dabbo cirarattasamāhito,
Akuhako nipako apihālu;
Santaṁ padaṁ ajjhagamā muni paṭicca,
Parinibbuto kaṅkhati kālan”ti.

[¶22] SN 8.3 · Good-Hearted

> Pali: SN 8.3 · Pesalasutta

[¶23] At one time Venerable Vaṅgīsa was staying near Āḷavī, at Āḷavī’s premier shrine, together with his mentor, Venerable Nigrodhakappa.

> Pali: Ekaṁ samayaṁ āyasmā vaṅgīso āḷaviyaṁ viharati aggāḷave cetiye āyasmatā nigrodhakappena upajjhāyena saddhiṁ.

[¶24] Now at that time Venerable Vaṅgīsa looked down upon other good-hearted mendicants because of his own eloquence.

> Pali: Tena kho pana samayena āyasmā vaṅgīso attano paṭibhānena aññe pesale bhikkhū atimaññati.

[¶25] Then he thought, “It’s my loss, my misfortune, that I look down on other good-hearted mendicants because of my own eloquence.”

> Pali: Atha kho āyasmato vaṅgīsassa etadahosi: “alābhā vata me, na vata me lābhā; dulladdhaṁ vata me, na vata me suladdhaṁ; yvāhaṁ attano paṭibhānena aññe pesale bhikkhū atimaññāmī”ti.

[¶26] Then, on the occasion of arousing remorse in himself, he recited these verses:

> Pali: Atha kho āyasmā vaṅgīso attanāva attano vippaṭisāraṁ uppādetvā tāyaṁ velāyaṁ imā gāthāyo abhāsi:

[¶27] “Give up conceit, Gotama!
Completely abandon the different kinds of conceit!
Besotted with the different kinds of conceit,
you’ve had regrets for a long time.

> Pali: “Mānaṁ pajahassu gotama,
Mānapathañca pajahassu;
Asesaṁ mānapathasmiṁ,
Samucchito vippaṭisārīhuvā cirarattaṁ.

[¶28] Smeared by smears and slain by conceit,
people fall into hell.
When people slain by conceit are reborn in hell,
they grieve for a long time.

> Pali: Makkhena makkhitā pajā,
Mānahatā nirayaṁ papatanti;
Socanti janā cirarattaṁ,
Mānahatā nirayaṁ upapannā.

[¶29] But a mendicant who practices rightly,
a path-victor, never grieves.
They enjoy happiness and a good reputation,
and they rightly call him a ‘Seer of Truth’.

> Pali: Na hi socati bhikkhu kadāci,
Maggajino sammāpaṭipanno;
Kittiñca sukhañca anubhoti,
Dhammadasoti tamāhu pahitattaṁ.

[¶30] So being not hard-hearted, but energetic,
with hindrances given up, pure;
and having completely given up conceit,
the one who makes an end with knowledge is assuaged.”

> Pali: Tasmā akhilodha padhānavā,
Nīvaraṇāni pahāya visuddho;
Mānañca pahāya asesaṁ,
Vijjāyantakaro samitāvī”ti.

[¶31] SN 8.4 · With Ānanda

> Pali: SN 8.4 · Ānandasutta

[¶32] At one time Venerable Ānanda was staying near Sāvatthī in Jeta’s Grove, Anāthapiṇḍika’s monastery.

> Pali: Ekaṁ samayaṁ āyasmā ānando sāvatthiyaṁ viharati jetavane anāthapiṇḍikassa ārāme.

[¶33] Then Venerable Ānanda robed up in the morning and, taking his bowl and robe, entered Sāvatthī for alms with Venerable Vaṅgīsa as his second monk.

> Pali: Atha kho āyasmā ānando pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi āyasmatā vaṅgīsena pacchāsamaṇena.

[¶34] And at that time Venerable Vaṅgīsa became dissatisfied, as lust infected his mind. Then he addressed Ānanda in verse:

> Pali: Tena kho pana samayena āyasmato vaṅgīsassa anabhirati uppannā hoti, rāgo cittaṁ anuddhaṁseti. Atha kho āyasmā vaṅgīso āyasmantaṁ ānandaṁ gāthāya ajjhabhāsi:

[¶35] “I’ve got a burning desire for pleasure;
My mind is on fire!
Please, out of compassion, Gotama,
tell me how to quench the flames.”

> Pali: “Kāmarāgena ḍayhāmi,
cittaṁ me pariḍayhati;
Sādhu nibbāpanaṁ brūhi,
anukampāya gotamā”ti.

[¶36] “Your mind is on fire
because of a perversion of perception.
Turn away from the feature of things
that’s attractive, provoking lust.

> Pali: “Saññāya vipariyesā,
cittaṁ te pariḍayhati;
Nimittaṁ parivajjehi,
subhaṁ rāgūpasaṁhitaṁ.

[¶37] See all conditioned phenomena as alien,
as suffering and not-self.
Extinguish the great fire of lust,
don’t burn up again and again.

> Pali: Saṅkhāre parato passa,
dukkhato mā ca attato;
Nibbāpehi mahārāgaṁ,
mā ḍayhittho punappunaṁ.

[¶38] With mind unified and serene,
meditate on the ugly aspects of the body.
With mindfulness immersed in the body,
be full of disillusionment.

> Pali: Asubhāya cittaṁ bhāvehi,
ekaggaṁ susamāhitaṁ;
Sati kāyagatā tyatthu,
nibbidābahulo bhava.

[¶39] Meditate on the signless,
give up the underlying tendency to conceit;
and when you comprehend conceit,
you will live at peace.”

> Pali: Animittañca bhāvehi,
mānānusayamujjaha;
Tato mānābhisamayā,
upasanto carissasī”ti.

[¶40] SN 8.5 · Well-Spoken Words

> Pali: SN 8.5 · Subhāsitasutta

[¶41] At Sāvatthī.

> Pali: Sāvatthinidānaṁ.

[¶42] There the Buddha addressed the mendicants, “Mendicants!”

> Pali: Tatra kho bhagavā bhikkhū āmantesi: “bhikkhavo”ti.

[¶43] “Venerable sir,” they replied. The Buddha said this:

> Pali: “Bhadante”ti te bhikkhū bhagavato paccassosuṁ. Bhagavā etadavoca:

[¶44] “Mendicants, speech that has four factors is well spoken, not poorly spoken. It’s blameless and is not criticized by sensible people. What four? It’s when a mendicant speaks well, not poorly; their speech is principled, not unprincipled; they speak pleasantly, not unpleasantly; and they speak truthfully, not falsely. Speech with these four factors is well spoken, not poorly spoken. It’s blameless and is not criticized by sensible people.”

> Pali: “Catūhi, bhikkhave, aṅgehi samannāgatā vācā subhāsitā hoti, no dubbhāsitā; anavajjā ca ananuvajjā ca viññūnaṁ. Katamehi catūhi? Idha, bhikkhave, bhikkhu subhāsitaṁyeva bhāsati no dubbhāsitaṁ, dhammaṁyeva bhāsati no adhammaṁ, piyaṁyeva bhāsati no appiyaṁ, saccaṁyeva bhāsati no alikaṁ. Imehi kho, bhikkhave, catūhi aṅgehi samannāgatā vācā subhāsitā hoti, no dubbhāsitā, anavajjā ca ananuvajjā ca viññūnan”ti.

[¶45] That is what the Buddha said. Then the Holy One, the Teacher, went on to say:

> Pali: Idamavoca bhagavā. Idaṁ vatvāna sugato athāparaṁ etadavoca satthā:

[¶46] “Good people say well-spoken words are foremost;
second, speech ought be principled, not unprincipled;
third, speak pleasantly, not unpleasantly;
and fourth, speak truthfully, not falsely.”

> Pali: “Subhāsitaṁ uttamamāhu santo,
Dhammaṁ bhaṇe nādhammaṁ taṁ dutiyaṁ;
Piyaṁ bhaṇe nāppiyaṁ taṁ tatiyaṁ,
Saccaṁ bhaṇe nālikaṁ taṁ catutthan”ti.

[¶47] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶48] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶49] Then Vaṅgīsa extolled the Buddha in his presence with fitting verses:

> Pali: Atha kho āyasmā vaṅgīso bhagavantaṁ sammukhā sāruppāhi gāthāhi abhitthavi:

[¶50] “Speak only those words
that do not hurt yourself
nor harm others;
such speech is truly well spoken.

> Pali: “Tameva vācaṁ bhāseyya,
yāyattānaṁ na tāpaye;
Pare ca na vihiṁseyya,
sā ve vācā subhāsitā.

[¶51] Speak only pleasing words,
words gladly welcomed.
Pleasing words are those
that bring nothing bad to others.

> Pali: Piyavācaṁva bhāseyya,
yā vācā paṭinanditā;
Yaṁ anādāya pāpāni,
paresaṁ bhāsate piyaṁ.

[¶52] Truth itself is undying speech:
this is an ancient teaching.
Good people say the teaching and meaning
are grounded in truth.

> Pali: Saccaṁ ve amatā vācā,
esa dhammo sanantano;
Sacce atthe ca dhamme ca,
āhu santo patiṭṭhitā.

[¶53] The words spoken by the Buddha
for finding the sanctuary, extinguishment,
for making an end of suffering:
this really is the best kind of speech.”

> Pali: Yaṁ buddho bhāsate vācaṁ,
khemaṁ nibbānapattiyā;
Dukkhassantakiriyāya,
sā ve vācānamuttamā”ti.

[¶54] SN 8.6 · With Sāriputta

> Pali: SN 8.6 · Sāriputtasutta

[¶55] At one time Venerable Sāriputta was staying near Sāvatthī in Jeta’s Grove, Anāthapiṇḍika’s monastery.

> Pali: Ekaṁ samayaṁ āyasmā sāriputto sāvatthiyaṁ viharati jetavane anāthapiṇḍikassa ārāme.

[¶56] Now at that time Venerable Sāriputta was educating, encouraging, firing up, and inspiring the mendicants in the assembly hall with a Dhamma talk. His words were polished, clear, articulate, and expressed the meaning. And those mendicants were paying attention, applying the mind, concentrating wholeheartedly, and actively listening.

> Pali: Tena kho pana samayena āyasmā sāriputto bhikkhū dhammiyā kathāya sandasseti samādapeti samuttejeti sampahaṁseti poriyā vācāya vissaṭṭhāya anelagalāya atthassa viññāpaniyā. Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti.

[¶57] Then Venerable Vaṅgīsa thought, “This Venerable Sāriputta is educating the mendicants. … And those mendicants are paying attention, applying the mind, concentrating wholeheartedly, and actively listening. Why don’t I extoll him in his presence with fitting verses?”

> Pali: Atha kho āyasmato vaṅgīsassa etadahosi: “ayaṁ kho āyasmā sāriputto bhikkhū dhammiyā kathāya sandasseti samādapeti samuttejeti sampahaṁseti poriyā vācāya vissaṭṭhāya anelagalāya atthassa viññāpaniyā. Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti. Yannūnāhaṁ āyasmantaṁ sāriputtaṁ sammukhā sāruppāhi gāthāhi abhitthaveyyan”ti.

[¶58] Then Venerable Vaṅgīsa rose from his seat, arranged his robe over one shoulder, raised his cupped palms toward Sāriputta, and said, “I feel inspired to speak, Reverend Sāriputta! I feel inspired to speak, Reverend Sāriputta!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yenāyasmā sāriputto tenañjaliṁ paṇāmetvā āyasmantaṁ sāriputtaṁ etadavoca: “paṭibhāti maṁ, āvuso sāriputta, paṭibhāti maṁ, āvuso sāriputtā”ti.

[¶59] “Then speak as you feel inspired,” said Sāriputta.

> Pali: “Paṭibhātu taṁ, āvuso vaṅgīsā”ti.

[¶60] Then Vaṅgīsa extolled Sāriputta in his presence with fitting verses:

> Pali: Atha kho āyasmā vaṅgīso āyasmantaṁ sāriputtaṁ sammukhā sāruppāhi gāthāhi abhitthavi:

[¶61] “Deep in wisdom, intelligent,
expert in the path and what is not the path;
Sāriputta, so greatly wise,
teaches Dhamma to the mendicants.

> Pali: “Gambhīrapañño medhāvī,
maggāmaggassa kovido;
Sāriputto mahāpañño,
dhammaṁ deseti bhikkhunaṁ.

[¶62] He teaches in brief,
or he speaks at length.
His call, like a myna bird,
overflows with eloquence.

> Pali: Saṅkhittenapi deseti,
vitthārenapi bhāsati;
Sāḷikāyiva nigghoso,
paṭibhānaṁ udīrayi.

[¶63] While he teaches
the mendicants listen to his sweet voice,
sounding attractive,
clear and graceful.
They listen joyfully,
their hearts elated.”

> Pali: Tassa taṁ desayantassa,
suṇanti madhuraṁ giraṁ;
Sarena rajanīyena,
savanīyena vaggunā;
Udaggacittā muditā,
sotaṁ odhenti bhikkhavo”ti.

[¶64] SN 8.7 · The Invitation to Admonish

> Pali: SN 8.7 · Pavāraṇāsutta

[¶65] At one time the Buddha was staying near Sāvatthī in the stilt longhouse of Migāra’s mother in the Eastern Monastery, together with a large Saṅgha of around five hundred monks, all of whom were perfected ones. Now, at that time it was the sabbath—the full moon on the fifteenth day—and the Buddha was sitting in the open surrounded by the Saṅgha of monks for the invitation to admonish.

> Pali: Ekaṁ samayaṁ bhagavā sāvatthiyaṁ viharati pubbārāme migāramātupāsāde mahatā bhikkhusaṅghena saddhiṁ pañcamattehi bhikkhusatehi sabbeheva arahantehi. Tena kho pana samayena bhagavā tadahuposathe pannarase pavāraṇāya bhikkhusaṅghaparivuto abbhokāse nisinno hoti.

[¶66] Then the Buddha looked around the Saṅgha of monks, who were silent. He addressed them: “Come now, monks, I invite you all: Is there anything I’ve done by way of body or speech that you would criticize?”

> Pali: Atha kho bhagavā tuṇhībhūtaṁ bhikkhusaṅghaṁ anuviloketvā bhikkhū āmantesi: “handa dāni, bhikkhave, pavāremi vo. Na ca me kiñci garahatha kāyikaṁ vā vācasikaṁ vā”ti.

[¶67] When he had spoken, Venerable Sāriputta rose from his seat, arranged his robe over one shoulder, raised his cupped palms toward the Buddha, and said: “There is nothing, sir, that you’ve done by way of body or speech that we would criticize. For the Blessed One gave rise to the unarisen path, gave birth to the unborn path, and explained the unexplained path. He is the knower of the path, the discoverer of the path, the expert on the path. And now the disciples live following the path; they acquire it later. And sir, I invite the Blessed One. Is there anything I’ve done by way of body or speech that you would criticize?”

> Pali: Evaṁ vutte, āyasmā sāriputto uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “na kho mayaṁ, bhante, bhagavato kiñci garahāma kāyikaṁ vā vācasikaṁ vā. Bhagavā hi, bhante, anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido. Maggānugā ca, bhante, etarahi sāvakā viharanti pacchā samannāgatā; ahañca kho, bhante, bhagavantaṁ pavāremi. Na ca me bhagavā kiñci garahati kāyikaṁ vā vācasikaṁ vā”ti.

[¶68] “There is nothing, Sāriputta, that you’ve done by way of body or speech that I would criticize. Sāriputta, you are astute. You have great wisdom, widespread wisdom, laughing wisdom, swift wisdom, sharp wisdom, penetrating wisdom. A wheel-turning monarch’s oldest son rightly keeps wielding the power set in motion by his father. In the same way, Sāriputta rightly keeps rolling the supreme Wheel of Dhamma that was rolled forth by me.”

> Pali: “Na khvāhaṁ te, sāriputta, kiñci garahāmi kāyikaṁ vā vācasikaṁ vā. Paṇḍito tvaṁ, sāriputta, mahāpañño tvaṁ, sāriputta, puthupañño tvaṁ, sāriputta, hāsapañño tvaṁ, sāriputta, javanapañño tvaṁ, sāriputta, tikkhapañño tvaṁ, sāriputta, nibbedhikapañño tvaṁ, sāriputta. Seyyathāpi, sāriputta, rañño cakkavattissa jeṭṭhaputto pitarā pavattitaṁ cakkaṁ sammadeva anuppavatteti; evameva kho tvaṁ, sāriputta, mayā anuttaraṁ dhammacakkaṁ pavattitaṁ sammadeva anuppavattesī”ti.

[¶69] “Since it seems I have done nothing worthy of the Blessed One’s criticism, is there anything these five hundred monks have done by way of body or speech that you would criticize?”

> Pali: “No ce kira me, bhante, bhagavā kiñci garahati kāyikaṁ vā vācasikaṁ vā. Imesaṁ pana, bhante, bhagavā pañcannaṁ bhikkhusatānaṁ na kiñci garahati kāyikaṁ vā vācasikaṁ vā”ti.

[¶70] “There is nothing, Sāriputta, that these five hundred monks have done by way of body or speech that I would criticize. For of these five hundred monks, sixty have the three knowledges, sixty have the six direct knowledges, sixty are freed both ways, and the rest are freed by wisdom.”

> Pali: “Imesampi khvāhaṁ, sāriputta, pañcannaṁ bhikkhusatānaṁ na kiñci garahāmi kāyikaṁ vā vācasikaṁ vā. Imesañhi, sāriputta, pañcannaṁ bhikkhusatānaṁ saṭṭhi bhikkhū tevijjā, saṭṭhi bhikkhū chaḷabhiññā, saṭṭhi bhikkhū ubhatobhāgavimuttā, atha itare paññāvimuttā”ti.

[¶71] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶72] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶73] Then Vaṅgīsa extolled the Buddha in his presence with fitting verses:

> Pali: Atha kho āyasmā vaṅgīso bhagavantaṁ sammukhā sāruppāhi gāthāhi abhitthavi:

[¶74] “Today, on the fifteenth day sabbath,
five hundred monks have gathered together <j>to purify their precepts.
These untroubled sages <j>have cut off their fetters and bonds,
they will not be reborn again.

> Pali: “Ajja pannarase visuddhiyā,
Bhikkhū pañcasatā samāgatā;
Saṁyojanabandhanacchidā,
Anīghā khīṇapunabbhavā isī.

[¶75] Just as a wheel-turning monarch
surrounded by ministers
travels all around this
land girt by sea.

> Pali: Cakkavattī yathā rājā,
amaccaparivārito;
Samantā anupariyeti,
sāgarantaṁ mahiṁ imaṁ.

[¶76] So disciples with the three knowledges,
conquerors of death,
revere the winner of the battle,
the unsurpassed caravan leader.

> Pali: Evaṁ vijitasaṅgāmaṁ,
satthavāhaṁ anuttaraṁ;
Sāvakā payirupāsanti,
tevijjā maccuhāyino.

[¶77] All are sons of the Blessed One—
there is no rubbish here.
I bow to the Kinsman of the Sun,
destroyer of the dart of craving.”

> Pali: Sabbe bhagavato puttā,
palāpettha na vijjati;
Taṇhāsallassa hantāraṁ,
vande ādiccabandhunan”ti.

[¶78] SN 8.8 · Over a Thousand

> Pali: SN 8.8 · Parosahassasutta

[¶79] At one time the Buddha was staying near Sāvatthī in Jeta’s Grove, Anāthapiṇḍika’s monastery, together with a large Saṅgha of 1,250 mendicants.

> Pali: Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme mahatā bhikkhusaṅghena saddhiṁ aḍḍhatelasehi bhikkhusatehi.

[¶80] Now at that time the Buddha was educating, encouraging, firing up, and inspiring the mendicants with a Dhamma talk about extinguishment. And those mendicants were paying attention, applying the mind, concentrating wholeheartedly, and actively listening.

> Pali: Tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti. Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti.

[¶81] Then Venerable Vaṅgīsa thought, “The Buddha is educating, encouraging, firing up, and inspiring the mendicants with a Dhamma talk about extinguishment. And those mendicants are paying attention, applying the mind, concentrating wholeheartedly, and actively listening. Why don’t I extoll him in his presence with fitting verses?”

> Pali: Atha kho āyasmato vaṅgīsassa etadahosi: “ayaṁ kho bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti. Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti. Yannūnāhaṁ bhagavantaṁ sammukhā sāruppāhi gāthāhi abhitthaveyyan”ti.

[¶82] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶83] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶84] Then Vaṅgīsa extolled the Buddha in his presence with fitting verses:

> Pali: Atha kho āyasmā vaṅgīso bhagavantaṁ sammukhā sāruppāhi gāthāhi abhitthavi:

[¶85] “Over a thousand mendicants
revere the Holy One
as he teaches the immaculate Dhamma,
extinguishment, fearing nothing from any quarter.

> Pali: “Parosahassaṁ bhikkhūnaṁ,
sugataṁ payirupāsati;
Desentaṁ virajaṁ dhammaṁ,
nibbānaṁ akutobhayaṁ.

[¶86] They listen to the immaculate Dhamma
taught by the fully awakened Buddha;
the Buddha shines
at the fore of the mendicant Saṅgha.

> Pali: Suṇanti dhammaṁ vimalaṁ,
sammāsambuddhadesitaṁ;
Sobhati vata sambuddho,
bhikkhusaṅghapurakkhato.

[¶87] Blessed One, your name is ‘Giant’,
seventh of the seers.
You are like a great cloud
that rains on your disciples.

> Pali: Nāganāmosi bhagavā,
isīnaṁ isisattamo;
Mahāmeghova hutvāna,
sāvake abhivassati.

[¶88] I left my day’s meditation
out of desire to see the Teacher.
Great hero, your disciple Vaṅgīsa
bows at your feet.”

> Pali: Divāvihārā nikkhamma,
satthudassanakamyatā;
Sāvako te mahāvīra,
pāde vandati vaṅgiso”ti.

[¶89] “Vaṅgīsa, had you previously composed these verses, or did they spring to mind in the moment?”

> Pali: “Kiṁ nu te, vaṅgīsa, imā gāthāyo pubbe parivitakkitā, udāhu ṭhānasova taṁ paṭibhantī”ti?

[¶90] “They sprang to mind in the moment, sir.”

> Pali: “Na kho me, bhante, imā gāthāyo pubbe parivitakkitā, atha kho ṭhānasova maṁ paṭibhantī”ti.

[¶91] “Well then, Vaṅgīsa, speak some more spontaneously inspired verses.”

> Pali: “Tena hi taṁ, vaṅgīsa, bhiyyoso mattāya pubbe aparivitakkitā gāthāyo paṭibhantū”ti.

[¶92] “Yes, sir,” replied Vaṅgīsa. Then he extolled the Buddha with some more spontaneously inspired verses, not previously composed:

> Pali: “Evaṁ, bhante”ti kho āyasmā vaṅgīso bhagavato paṭissutvā bhiyyoso mattāya bhagavantaṁ pubbe aparivitakkitāhi gāthāhi abhitthavi:

[¶93] “Having overcome Māra’s wrong path,
you wander with hard-heartedness dissolved.
See him, the liberator from bonds,
dissecting the unattached section by section.

> Pali: “Ummaggapathaṁ mārassa abhibhuyya,
Carasi pabhijja khilāni;
Taṁ passatha bandhapamuñcakaraṁ,
Asitaṁ bhāgaso pavibhajaṁ.

[¶94] You have explained in many ways
the path to cross the flood.
The Seers of Truth stand unfaltering
in the freedom from death explained by you.

> Pali: Oghassa nittharaṇatthaṁ,
Anekavihitaṁ maggaṁ akkhāsi;
Tasmiñce amate akkhāte,
Dhammaddasā ṭhitā asaṁhīrā.

[¶95] As the bringer of light who has pierced the truth,
you’ve seen what lies beyond all planes.
When you saw and realized this for yourself,
you taught it first to the group of five.

> Pali: Pajjotakaro ativijjha,
Sabbaṭṭhitīnaṁ atikkamamaddasa;
Ñatvā ca sacchikatvā ca,
Aggaṁ so desayi dasaddhānaṁ.

[¶96] When the Dhamma has been so well taught,
how could those who know it be negligent?
That’s why, being diligent, we should always train
respectfully in the Buddha’s teaching.”

> Pali: Evaṁ sudesite dhamme,
Ko pamādo vijānataṁ dhammaṁ;
Tasmā hi tassa bhagavato sāsane,
Appamatto sadā namassamanusikkhe”ti.

[¶97] SN 8.9 · With Koṇḍañña

> Pali: SN 8.9 · Koṇḍaññasutta

[¶98] At one time the Buddha was staying near Rājagaha in the Bamboo Grove, the squirrels’ feeding ground.

> Pali: Ekaṁ samayaṁ bhagavā rājagahe viharati veḷuvane kalandakanivāpe.

[¶99] Then Venerable Koṇḍañña Who Understood approached the Buddha after a very long absence. He bowed with his head to the Buddha’s feet, caressing them and covering them with kisses, and pronounced his name: “I am Koṇḍañña, Blessed One! I am Koṇḍañña, Holy One!”

> Pali: Atha kho āyasmā aññāsikoṇḍañño sucirasseva yena bhagavā tenupasaṅkami; upasaṅkamitvā bhagavato pādesu sirasā nipatitvā bhagavato pādāni mukhena ca paricumbati, pāṇīhi ca parisambāhati, nāmañca sāveti: “koṇḍaññohaṁ, bhagavā, koṇḍaññohaṁ, sugatā”ti.

[¶100] Then Venerable Vaṅgīsa thought, “This Venerable Koṇḍañña Who Understood has approached the Buddha after a very long absence. He bowed with his head to the Buddha’s feet, caressing them and covering them with kisses, and pronounced his name: ‘I am Koṇḍañña, Blessed One! I am Koṇḍañña, Holy One!’ Why don’t I extoll him in the Buddha’s presence with fitting verses?”

> Pali: Atha kho āyasmato vaṅgīsassa etadahosi: “ayaṁ kho āyasmā aññāsikoṇḍañño sucirasseva yena bhagavā tenupasaṅkami; upasaṅkamitvā bhagavato pādesu sirasā nipatitvā bhagavato pādāni mukhena ca paricumbati, pāṇīhi ca parisambāhati, nāmañca sāveti: ‘koṇḍaññohaṁ, bhagavā, koṇḍaññohaṁ, sugatā’ti. Yannūnāhaṁ āyasmantaṁ aññāsikoṇḍaññaṁ bhagavato sammukhā sāruppāhi gāthāhi abhitthaveyyan”ti.

[¶101] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶102] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶103] Then Vaṅgīsa extolled Koṇḍañña in the Buddha’s presence with fitting verses:

> Pali: Atha kho āyasmā vaṅgīso āyasmantaṁ aññāsikoṇḍaññaṁ bhagavato sammukhā sāruppāhi gāthāhi abhitthavi:

[¶104] “The senior monk awakened after the Buddha,
Koṇḍañña, is keenly energetic.
He regularly gains
the blissful meditations of seclusion.

> Pali: “Buddhānubuddho so thero,
koṇḍañño tibbanikkamo;
Lābhī sukhavihārānaṁ,
vivekānaṁ abhiṇhaso.

[¶105] Whatever can be attained by a disciple
who does the Teacher’s bidding,
he has attained it all,
through diligently training himself.

> Pali: Yaṁ sāvakena pattabbaṁ,
satthusāsanakārinā;
Sabbassa taṁ anuppattaṁ,
appamattassa sikkhato.

[¶106] With great power and the three knowledges,
expert in encompassing the minds of others,
Koṇḍañña, the heir to the Buddha,
bows at the Teacher’s feet.”

> Pali: Mahānubhāvo tevijjo,
cetopariyāyakovido;
Koṇḍañño buddhadāyādo,
pāde vandati satthuno”ti.

[¶107] SN 8.10 · With Moggallāna

> Pali: SN 8.10 · Moggallānasutta

[¶108] At one time the Buddha was staying on the slopes of Isigili at the Black Rock, together with a large Saṅgha of five hundred mendicants, all of whom were perfected ones. Thereupon, with his mind, Venerable Mahāmoggallāna scrutinized whose mind was liberated and free of attachments.

> Pali: Ekaṁ samayaṁ bhagavā rājagahe viharati isigilipasse kāḷasilāyaṁ mahatā bhikkhusaṅghena saddhiṁ pañcamattehi bhikkhusatehi sabbeheva arahantehi. Tesaṁ sudaṁ āyasmā mahāmoggallāno cetasā cittaṁ samannesati vippamuttaṁ nirupadhiṁ.

[¶109] Then Venerable Vaṅgīsa thought, “The Buddha is staying on the slopes of Isigili … with five hundred perfected ones. Mahāmoggallāna is scrutinizing whose mind is liberated and free of attachments. Why don’t I extoll him in the Buddha’s presence with fitting verses?”

> Pali: Atha kho āyasmato vaṅgīsassa etadahosi: “ayaṁ kho bhagavā rājagahe viharati isigilipasse kāḷasilāyaṁ mahatā bhikkhusaṅghena saddhiṁ pañcamattehi bhikkhusatehi sabbeheva arahantehi. Tesaṁ sudaṁ āyasmā mahāmoggallāno cetasā cittaṁ samannesati vippamuttaṁ nirupadhiṁ. Yannūnāhaṁ āyasmantaṁ mahāmoggallānaṁ bhagavato sammukhā sāruppāhi gāthāhi abhitthaveyyan”ti.

[¶110] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶111] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶112] Then Vaṅgīsa extolled Mahāmoggallāna in his presence with fitting verses:

> Pali: Atha kho āyasmā vaṅgīso āyasmantaṁ mahāmoggallānaṁ bhagavato sammukhā sāruppāhi gāthāhi abhitthavi:

[¶113] “As the sage, who has gone beyond suffering,
sits upon the mountain slope,
he is revered by disciples with the three knowledges,
conquerors of death.

> Pali: “Nagassa passe āsīnaṁ,
muniṁ dukkhassa pāraguṁ;
Sāvakā payirupāsanti,
tevijjā maccuhāyino.

[¶114] Moggallāna, of great psychic power,
encompasses with his mind,
scrutinizing their minds,
liberated, free of attachments.

> Pali: Te cetasā anupariyeti,
Moggallāno mahiddhiko;
Cittaṁ nesaṁ samannesaṁ,
Vippamuttaṁ nirūpadhiṁ.

[¶115] That is how those endowed <j>with many fine qualities
revere Gotama,
the sage gone beyond suffering,
perfect in every respect.”

> Pali: Evaṁ sabbaṅgasampannaṁ,
Muniṁ dukkhassa pāraguṁ;
Anekākārasampannaṁ,
Payirupāsanti gotaman”ti.

[¶116] SN 8.11 · At Gaggarā

> Pali: SN 8.11 · Gaggarāsutta

[¶117] At one time the Buddha was staying near Campā on the banks of the Gaggarā Lotus Pond, together with a large Saṅgha of five hundred mendicants, seven hundred male and seven hundred female lay followers, and many thousands of deities. But the Buddha outshone them all in beauty and glory.

> Pali: Ekaṁ samayaṁ bhagavā campāyaṁ viharati gaggarāya pokkharaṇiyā tīre mahatā bhikkhusaṅghena saddhiṁ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṁ bhagavā atirocati vaṇṇena ceva yasasā ca.

[¶118] Then Venerable Vaṅgīsa thought, “The Buddha is staying near Campā on the banks of the Gaggarā Lotus Pond, together with a large Saṅgha of five hundred mendicants, seven hundred male and seven hundred female lay followers, and many thousands of deities. And he outshines them all in beauty and glory. Why don’t I extoll him in his presence with fitting verses?”

> Pali: Atha kho āyasmato vaṅgīsassa etadahosi: “ayaṁ kho bhagavā campāyaṁ viharati gaggarāya pokkharaṇiyā tīre mahatā bhikkhusaṅghena saddhiṁ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṁ bhagavā atirocati vaṇṇena ceva yasasā ca. Yannūnāhaṁ bhagavantaṁ sammukhā sāruppāya gāthāya abhitthaveyyan”ti.

[¶119] Then Venerable Vaṅgīsa rose from his seat, arranged his robe over one shoulder, raised his cupped palms toward the Buddha, and said, “I feel inspired to speak, Blessed One! I feel inspired to speak, Holy One!”

> Pali: Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca: “paṭibhāti maṁ, bhagavā, paṭibhāti maṁ, sugatā”ti.

[¶120] “Then speak as you feel inspired,” said the Buddha.

> Pali: “Paṭibhātu taṁ, vaṅgīsā”ti bhagavā avoca.

[¶121] Then Vaṅgīsa extolled the Buddha in his presence with fitting verses:

> Pali: Atha kho āyasmā vaṅgīso bhagavantaṁ sammukhā sāruppāya gāthāya abhitthavi:

[¶122] “Like the moon on a cloudless night,
like the shining immaculate sun,
so too Aṅgīrasa, O great sage,
your glory outshines the entire world.”

> Pali: “Cando yathā vigatavalāhake nabhe,
Virocati vigatamalova bhāṇumā;
Evampi aṅgīrasa tvaṁ mahāmuni,
Atirocasi yasasā sabbalokan”ti.

[¶123] SN 8.12 · With Vaṅgīsa

> Pali: SN 8.12 · Vaṅgīsasutta

[¶124] At one time Venerable Vaṅgīsa was staying near Sāvatthī in Jeta’s Grove, Anāthapiṇḍika’s monastery.

> Pali: Ekaṁ samayaṁ āyasmā vaṅgīso sāvatthiyaṁ viharati jetavane anāthapiṇḍikassa ārāme.

[¶125] Now at that time Vaṅgīsa had recently attained perfection. While experiencing the bliss of freedom, on that occasion he recited these verses:

> Pali: Tena kho pana samayena āyasmā vaṅgīso aciraarahattappatto hutvā vimuttisukhaṁ paṭisaṁvedī tāyaṁ velāyaṁ imā gāthāyo abhāsi:

[¶126] “We used to wander, drunk on poetry,
village to village, town to town.
Then we saw the Buddha,
and faith arose in us.

> Pali: “Kāveyyamattā vicarimha pubbe,
Gāmā gāmaṁ purā puraṁ;
Athaddasāma sambuddhaṁ,
Saddhā no upapajjatha.

[¶127] He taught me Dhamma:
the aggregates, sense fields, and elements.
When I heard his teaching
I went forth to homelessness.

> Pali: So me dhammamadesesi,
khandhāyatanadhātuyo;
Tassāhaṁ dhammaṁ sutvāna,
pabbajiṁ anagāriyaṁ.

[¶128] It was truly for the benefit of many
that the sage achieved awakening—
for the monks and for the nuns
who see that they’ve reached certainty.

> Pali: Bahunnaṁ vata atthāya,
bodhiṁ ajjhagamā muni;
Bhikkhūnaṁ bhikkhunīnañca,
ye niyāmagataddasā.

[¶129] It was so welcome for me
to be in the presence of the Buddha.
I’ve attained the three knowledges,
and fulfilled the Buddha’s instructions.

> Pali: Svāgataṁ vata me āsi,
mama buddhassa santike;
Tisso vijjā anuppattā,
kataṁ buddhassa sāsanaṁ.

[¶130] I know my past lives,
my clairvoyance is purified,
I am master of three knowledges, <j>attained in psychic power,
expert in encompassing the minds of others.”

> Pali: Pubbenivāsaṁ jānāmi,
Dibbacakkhuṁ visodhitaṁ;
Tevijjo iddhipattomhi,
Cetopariyāyakovido”ti.

[¶131] > Pali: Tassuddānaṁ

[¶132] > Pali: Nikkhantaṁ arati ceva,
pesalā atimaññanā;
Ānandena subhāsitā,
sāriputtapavāraṇā;
Parosahassaṁ koṇḍañño,
moggallānena gaggarā;
Vaṅgīsena dvādasāti.

[¶133] The Linked Discourses with Vaṅgīsa are complete.

> Pali: Vaṅgīsasaṁyuttaṁ samattaṁ.